Վիլյամ Սարոյան. արձակագիր
Վիլյամ Սարոյանը XX դարի առաջին կեսի ամերիկյան ամենահեղինակավոր գրողներից է։ Նա ներկայացնում է գյուղական Ամերիկայի դժվարություններն ու վայելքները՝ Կալիֆորնիայի Կենտրոնական հովտի գյուղերի օրինակով: Արժանացել է Պուլիցերյան, Օսկար և Նյու Յորքի Դրամայի Քննադատների Ակումբի մրցանակներին:
Ծագումը
Սարոյանը ծնվել է 1908 թ. Ֆրեզնոյում։ Նրա ծնողները 1915թ. Հայոց Ցեղասպանությունից առաջ Բիթլիսից տեղափոխվել էին Միացյալ Նահանգներ։ Հայրը երիտասարդ տարիքում մահացել է և Սարոյանն իր եղբոր ու քրոջ հետ ստիպված է եղել ապրել որբանոցում։ Տարիներ անց նոր վերամիավորվել են մոր հետ։
Ճանաչված է
Հրապարակել է բազում նովելներ, պատմվածքներ և պիեսներ, այդ թվում՝ «Իմ սիրտը լեռներում է», «Մարդկային կատակերգություն», «Խիզախ պատանին թռչող ճոճաձողի վրա», «Իմ անունը Արամ է», «Կյանքիդ ժամանակը»։
Նշանավոր մտքեր
-Փորձիր սովորել խորը շնչել, ուտելիս իսկապես համտեսել կերածդ, և խորը քնել, երբ պառկում ես քնելու։ Ամբողջ ուժով արա ինչ կարող ես՝ քեզ ամբողջությամբ կենդանի զգալու համար։ Ծիծաղելիս՝ քահ-քահ ծիծաղիր։ Ջղայնանալիս՝ կատաղիր։ Փորձիր ողջ լինել։ Շատ շուտով մեռնելու ես։
-Մեռնում են բոլորը, բայց ես միշտ հավատացել եմ, թե բացառություն կլինեմ։ Եվ ի՞նչ...:
-Գիտեմ, որ սա կհիշեք. լավ բանն ավարտ չունի։ Եթե վերջանար, աշխարհում մարդ չէր մնա, կյանք չէր մնա։ Ոչ մի տեղ։ Իսկ աշխարհը լի է մարդկանցով ու հրաշալի կյանքով։
Այլոց խոսքով
«Նա դարի ամենաթերագնահատված գրողներից է։ Նրա տեղն իրավամբ Հեմինգուեյի, Ստեյնբեկի և Ֆոլկների կողքին է»,-ասել է բրիտանացի գրող, քննադատ, դերասան Ստեֆըն Ֆրայը:
«… Գրող, որ կյանքից մեծ էր…»,– գրել է San Francisco Chronicle-ը:
Նշանավոր գործեր
Շուտով
«Իթակա» (Մեգ Ռայանի կինոնկարը։ Դերերում՝ Թոմ Հենքս։ «Մարդկային կատակերգություն» վեպի կինոադապտացիան):
